प्रणाली मंगेश महाशब्दे
खरंतर, अबोला या शब्दाचा अर्थ रुसवा किंवा द्वेष या कारणांमुळे एकमेकांशी न बोलणे असा होतो. काही वेळेस हा अबोला क्षणिक किंवा लटका असतो तर, काही वेळेस मात्र हा अबोला खूप दिवस चालणारा असतो. नातं कोणतेही असो प्रत्येकानेच अबोला हा अनुभवलेला असतो. नातं जितकं जवळचं तितका अबोला हा नेहमीचाच ठरलेला असतो. प्रत्येक नात्यामधील अबोल्याचा काळ हा त्या नात्यातील जवळीकीवर अवलंबून असतो!
रुसणे, अबोला धरणे आणि नंतर त्या व्यक्तीला मनवणे यावर तर किती छान-छान गाणी पण आहेत – जसे ‘हा रुसवा सोड सखे… सोड ना अबोला’; ‘का रे दुरावा का रे अबोला… ‘, ‘सजणा कशासी अबोला…’, ‘अबोल प्रीत बहरली…’ ही आणि अशी अनेक.
अबोल्यामध्ये संवाद नसतो, असे म्हणतात. परंतु खरंतर, आपण त्याच व्यक्तीबरोबर संवाद जास्त करतो, त्याचाच विचार जास्त करतो, पण मनात! हो ना? म्हणजेच दृश्य स्वरुपातील अबोला हा अदृश्य स्वरुपात जास्त संवाद साधणारा असतो… मग हा अबोला पूर्ण कसा होईल? अबोल्यामध्ये उलट विचार, आठवणी जास्त येतात. मग जिंकतं कोण, अबोला की त्या व्यक्तींमधील नाते?
हेही वाचा – गोफ… सुखद आठवणींचा!
अबोला हा मीठासारखा असावा. पदार्थाची चव व्यवस्थित ठेवणारा. जास्त किंवा कमी दोन्हीपण घातकच! अबोल्यामुळे शरीराचे आणि मनाचे दोन्हीचे आरोग्य बिघडते. यावर उपाय माहीत असून मन मानायला तयार होत नाही. मनाचे युद्ध सुरूच रहाते… अबोला वाढला तर संवादाला सुरुवात कोणी करायची? माघार कोणी घ्यायची? माझी जर चूकच नाही तर मी का बोलायचे? अशी मनातील वादळे अबोल्याबरोबर वाढत जातात…
हेही वाचा – थिंक पॉझिटिव्ह
मग काय करायचे तर शरीर आणि मन दोन्ही व्यवस्थित राहण्यासाठी अबोला क्षणिक ठेवून मनातील संवाद समोरासमोर बसून करायचा. बोलून मोकळे व्हायचे. मनात अढी ठेवण्यापेक्षा नात्यात संवादाची गोडी ठेवायची.
संतांनी सुद्धा म्हटले आहे, “ब्रह्माचा अबोला फिटावा, अद्वैतत्वे तो भेटावा.”
मग काय मनाचे ऐकायचे आणि अबोल्यापेक्षा बोलते व्हायचे. चालेल ना!
मोबाइल – 9730020494
विचार, साहित्य, कला आणि संस्कृतीच्या सर्जनशीलतेला समर्पित असलेल्या avantar.creativemarketix.com/ या वेबपोर्टलवरील वैविध्यपूर्ण वाचनीय लेखाचा आनंद घ्यायचा असेल तर,
IXZVpuvKFwKH6gb0NBN51t?mode=r_c
या लिंकला क्लिक करून WhatsApp group जॉइन करा.
