माधवी जोशी माहुलकर
मिसळीचे वरण किंवा मिश्र डाळींचे वरण हे महाराष्ट्रातील बहुतेक सगळ्याच भागात घरोघरी बनत असेल. तूर, मूग, मसूर, उडीद, चणाडाळ आणि असेल तर चवळीची डाळ असे मिश्रण असलेले खमंग तसेच आले-लसूण पेस्ट, खोबरे, शेंगदाणे, खसखस, तमालपत्र, दालचिनी वापरून केलेले मसालेदार वरण ज्वारीच्या भाकरीसोबत भुरके मारून खाताना किती खातोय ते समजतच नाही. आज मी खूप दिवसांनी हे वरण केले; कारण नागपूरमध्ये सध्या थंडीने परत एकदा जोर पकडला आहे, त्यामुळे अशा वातावरणात हे तडकेदार वरण आहारात असलं तर सहजच शरीरात उर्जा निर्माण होते. थंडीमध्ये असे गरम पदार्थ चालून जातात. हे वरण थोडे पातळसरच करावे, त्यामुळे तुम्हाला ते बाऊलमध्ये घेऊन सूप म्हणूनही त्याचा आस्वाद घेता येतो. सर्व प्रकारच्या डाळींमुळे या मिसळीच्या वरणाची चव अफलातून लागते…
साहित्य
- तूरडाळ – 1 छोटी वाटी
- मसूरडाळ – 1 छोटी वाटी
- चणाडाळ – 1 छोटी वाटी
- मूगडाळ – 1 छोटी वाटी
- उडदडाळ – 1 छोटी वाटी
- चवळी डाळ – 1 छोटी वाटी (ऐच्छिक)
- सुक्या लाल मिरच्या – 2 ते 3
- खसखस – 1 छोटी वाटी
- खोबरे – 1 छोटा तुकडा
- आले – 1 इंच
- धने – 1 छोटा चमचा
- जिरे – 1 छोटा चमचा
- लसूण – 6 ते 7 पाकळ्या
- तमालपत्र – 1
- दालचिनी – 1 तुकडा
- तिखट – चवीनुसार
- मीठ – चवीनुसार
- गरम मसाला – 1 लहान चमचा
- हळद – 1 लहान चमचा
- कांदा – 1 (बारीक चिरलेला)
- बारीक चिरलेली कोथिंबीर – मुठभर
- तेल – फोडणीकरिता
हेही वाचा – Recipe : उपवासाचे दहीवाले आलू करून पाहिले आहेत का?
कृती
- सर्व डाळी एकत्रितपणे स्वच्छ धुऊन प्रेशर कुकरमध्ये शिजवून घ्याव्यात.
- कढईमध्ये प्रथम अगदी थोड्या तेलावर कांदा, धणे, खोबरे, खसखस, जिरे, लाल सुक्या मिर्च्या परतून घ्याव्यात आणि मिश्रण थंड झाले की, मिक्सरमध्ये याची छान पेस्ट करून घ्यावी.
- आले आणि लसणाचीही पेस्ट करून घ्यावी.
- प्रेशर कुकरची वाफ गेल्यावर डाळी काढून घेऊन त्या व्यवस्थित घोटून घ्याव्यात.
- कढईत पळीभर तेल टाकून मोहरी, जिरे तडतडवून घ्यावे, थोडा हिंग टाकावा आणि त्यातच तमालपत्र तसेच दालचिनीचा तुकडा टाकावा.
- नंतर वाटलेला मसाला त्यात मिक्स करून तेल सुटेपर्यंत परतावा.
- आले, लसणाची पेस्ट टाकून तीपण मसाल्यात छान परतून घ्यावी.
- त्यामध्ये एक चमचा हळद, दोन छोटे चमचे तिखट, एक चमचा गरम मसाला, चवीनुसार मीठ टाकावे आणि थोडे पाणी टाकून मसाल्याचा सुगंध येऊ द्यावा.
- नंतर त्यामध्ये घोटलेल्या सर्व डाळींचे मिश्रण टाकावे आणि छान मिक्स करावे.
- पाणी टाकून हे मिसळीचे वरण आपल्याला पाहिजे तेवढे दाटसर किंवा पातळसर करावे आणि उकळू द्यावे.
हेही वाचा – Recipe : तुपातील तुरीचे दाणे आणि वाणीचा हुरडा!
टिप्स
- या वरणासोबत भाकरी, लाल मिरचीचा ठेचा घ्यावा. भाकरीचा कुस्करा करावा त्यावर हे मिसळीचे गरमागरम वरण घ्यावे, वरून लसूण आणि लाल मिरचीचे तेल घ्यावे. हा कुस्करा मस्त कालवावा आणि सोबतीला कांदा, मुळा, मेथी घ्यावे.
- लाल मिरचीचा ठेचा तोंडी लावण्यापुरता घेऊन या वरणाचा आस्वाद घ्यावा.
- मधेच हे वरण सुपसारखे वाटीने प्यावे की, ब्रम्हानंदी टाळी लागलीच म्हणून समजा.
- डाळीच्या मापाकरिता नैवेद्याची छोटी वाटी वापरावी.
तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.
या ईमेलवर किंवा
9869975883 या व्हॉट्सॲप क्रमांकावर
तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.
